هذا الشئ المرعب

إهدأ إلى عايدة الكاشف

دونت تيك ات بيرسونالي

ما هو البوت؟

البوت هو نوع من أنواع الحذاء يغطي منطقة القدم والكعب والرجل تحت الركبة وأحناً فوقها.

حلو…

طيب..

ما هو البوت الصندل؟

هو دة…

إنتشر البوت الصندل في الثلاث سنوات الأخيرة تحت رعاية الموضة اللعينة..

و بعدين أنا مش فاهمة.. مالها الصنادل الكلاسيكية الجميلة؟

لازم يعني نتفحلس؟

أنا بصراحة مش عرفة ما هو هذا الكائن الهلامي المرعب.. ولكنه ليس بالتأكيد موضة لطيفة..

وفي حالة اقتنائه أرجو التخلص منه فوراً.

Advertisements

عن موضوع برسيل عباية..

يسعد مساكم، بقالي كتير مكتبتش، معلش،

كنت قاعدة مع ماما بنتفرج على التليفزيون من كام يوم،

وجه إعلان في شدة الغرابة،

يعني بغض النظر عن الإعلان شخصياً.. مش هتكلم في الجانب الفني ولا الاخراج ولا التصوير ..

ولاحتى الملابس العجيبة التي كانت ترتديها الموديل.  (مع انها واللهي تستاهل الكلام..)

ولكن اللي لفت نظري وأثار حواسي هو المنتج شخصياً..

برسيل عباية

والمذهل كمان وكمان.. هو إن العبوة شخصياً سودا ومكلبظة ذي العباية تمام و أثناء الاعلان تتحول الموديل المرتدية العباية إلى العبوة شخصياً!!

وبعدين، قررت أكتبلكم، وقلت عشان الفرحة تبقى فرحتين لازم أعمل بوست للينك بتاع الإعلان،

وأثناء بحثي عن الإعلان، وجدت ما هو أعظم

مسابقة mbc 1 لأروع عباية!!

وها هو وصف المسابقة:

أعلن شامبو العباية برسيل عن إطلاق مسابقة “أروع عباية” وهي المسابقة الأولى من نوعها في العالم العربي ضمن برنامج صباح الخير يا عرب على شاشة MBC 1

لتصميم العباءات السوداء. وتهدف المسابقة إلى دعم الإبداع في تصميم العباية في العالم العربي

وتسليط الضوء على المواهب البارزة على صعيد تصميم العباءة في السوق السعودي وبقية الدول العربية.
تتيح مسابقة أروع عباية لتصميم العباءة السوداء على شاشة MBC 1 الفرصة للمصممين والمستهلكين على حدٍ سواء لتقديم أفكارهم المبدعة واختبارها من قبل مصممي عباءات مشهورين. الفائزة في هذه المسابقة تحصل على 50,000 ريال سعودي.

لمشاهدة الاعلان

لمشاهدة موضوع المسابقة

البالوون وصل!

تحت دعوة للألتزام بالزي الشرعي لقيت البالوون قدامي!

البلوون هو إختراع من بنت مصرية نجح ولقى إهتمام إقليمي كبير.

تصف غادة الشعشاعي – صاحبة الاختراع – بانه البديل الشرعي للكارينا. وقررت غادة أن تدع البادى جانبا، وترتدى الملابس التى تناسب حجابها وواجهت كثيرا من المشكلات حتى وصلت إلى البديل المناسب، وحققت المعادلة الصعبة بين الحجاب الشرعى وارتداء ملابس الموضة. وما يميز البالون عن الكرينا هو أنه يتجنب تكسيم منطقة الذراعين.

حجاب، اسدال، خمار، نقاب، ملحفة خليجي، عباية، اسدال، خليجي، حجاب….

كل سنة وانتم طيبين،
من كام سنة زارتنا واحدة قريبة خالي من بعيد من البلد، كنت ساعتها عندي بتاع ١٤ سنة تقريباً، وكانت علاقتي بالملابس زي علاقة المواطن المصري باللغة اليابانية،
بس أنا فاكرة إنها سألتني أول ما دخلنا الأوضة ووقفت قدام المرايا ، “إيه رأيك في شكلي بالاسدال دة؟، بقالي إسبوع بس بيه، حسيت كدة إن الوقت جه عشان اشيل الحجاب وأحط اسدال، و شوية شوية بمشيأة إلله هالبس الخمار.”

تيتا قالت لي الإسبوع اللي فات انها إتنقبت!

وبعدين قعدت أحاول أفكر في المراحل اللي مرت بها الست دي.. حجاب، واسدال، وخمار، ونقاب، وملحفة خليجي، وعباية.
وفي اللحظة دي اكتشفت اني معرفش الفرق بين الخمار والاسدال. يعني هو دة هيغطي إيه زيادة عن دة؟ فبحثت في الموضوع واكتشفت إن الخمار هو هو النقاب والاسدال هو “ملحفة الرأس” ويتكون من حتة واحدة من شعر ال راس للقدم، يعني مش بيقسم الجسم. وبيعتبروه بعض الناس محتشم أكثر من النقاب، رغم إنه مش بيغطي الوش.
المهم، أثناء بحثي اندمجت في منتديات البنات ومشاكلهم مع الملابس وللي لابسة خمار وبتفكر في الاسدال والعكس، ونقاشات على الحجاب المناسب.
لاحظت بقى إن محدش بيرد على حد، يعني واحدة مثلاً لابسة الخمار من أولى إبتدائي وبتسأل هل ألبس الاسدال ولا لأ؟؟  فقالوا لها “صلي صلاة استخارة وربنا هيهديكي” ودة كان تقريباً الرد الوحيد المتداول في المنتديات دي.
لكني لاقت منتدى واحد فيه رد واضح وصريح، وحسيت إنه هيسهل على ناس كتيرة أوي الوقت والمجهود.

نقاب دوبل

صباح الخير،

ماكنتش ناوية اكتب قبل أول السنة، أصلي بامتحن اليومين دول وقلت اركز شوية في المذكرة، ورغم التركيز لسة عندي شوية وقت اشرب قهوة الصبح وأبص بصة سريعة غير دقيقة على المصري اليوم، صفحة السينما، وحظك اليوم أول صفحة وأخر صفحة وشوية كراكيترات مش بتضحك، وقابلني ملف النقاب النهردة و من أول نظرة قالي خدي وقتك هنا شوية بقى، و تصفحته دون إهتمام شديد نظراً لإنه موضوع قديم. وكنت على وشك اني اقفل الجرنان وأفتح كتاب علم النفس لما لاقتلك يا أخويا عنوان تحت صغير في أخر الصفحة على الشمال مكتوب عليه ” نطاق أسماء بنت أبي بكر يتحول إلى نقاب (نظرية ذات النقابين ).

ومن هنا مش هاتكلم أنا.. هسيبكم مع حديث اسامة المهدي مع صاحب النظرية.

«أنت ما تعرفش السيدة أسماء بنت أبوبكر ذات النقابين؟ أمال تعليم إيه اللى بتتعلموه» كان الرجل السلفى صاحب محل لبيع ملابس المنقبات ينعى جيلاً لا يعرف الصحابية الجليلة أسماء بن أبى بكر ذات النطاقين، رجل فى الخمسين من عمره تقريبًا يصر على حتمية النقاب، ليس كفريضة فقط ولكن كمحاولة للتشبه بالصحابية التى تحولت على يديه من ذات النطاقين إلى ذات النقابين، «النقاب فرض والدليل عندى، وموجود فى السيرة، شوفت السيدة أسماء بنت أبى بكر وهى صحابية بنت صحابى كانت بتلبس نقابين، أصلها كانت جميلة أوى، وعشان كدا مكفهاش نقاب واحد، لأ جابت واحد تانى ولبسته، طبعا ماحدش بياخد باله من الحكاية دى عشان الجيل دا جيل جاهل لا يقرأ تاريخ الإسلام»

مش هطول عليكم بس أحب أسيبلكم لنك لقراءة الموضوع كاملاً

http://www.almasry-alyoum.com/article2.aspx?ArticleID=237274

كل سنة ونتم طيبين والقاكم على خير السنة اللي جاية.

وعد ومكتوب

طول عمري بحب الجزم أم كعب، زي أغلب البنات وهما صغيرين كنت بحاول ألبس جزم ماما أم كعب، ومريت بكل المراحل، من أول مرحلة رجلي وهي بتلق في الجزمة، إلى الوصول لمقاس المظبوط، حتى مؤخراً لما اكتشفت إن رجلي بقت أكبر من رجل ماما.. واشتريت جزم بكعب لنفسي.

معرفش ليه الجزم أم كعب بذات بتعتبر حاجة سكسي يعني.. يمكن عشان بتخلي الست طويلة؟ طب ما أنا طويلة من غير حاجة.. وبعدين الرجالة مش بيحبو البنات الطويلة.. عموماً مش موهم.. رغبات الرجالة مش موضوعنا.

بعد ما بدأت ألبس الجزم أم كعب بإنتظام.. اكتشفت الأزمة. الجزم أم كعب بتوجع..

مش بس بتوجع.. دي بتعور!

واكتشفت إن كل الستات بيكرهو الجزم أم كعب بعد أول سنة.. ومع ذلك بيلبسوها.. فاستمريت في لبسها. لحد ما في يوم طلعت لي فقفوقة في رجلي من الجزمة!! وكنت مع واحدة صحبتي وقلتلها أنا مش هالبس جزم بكعب تاني أنا مش عارفة ازاي بيلبسوها دي.. اتغيرت نظرة وشها وسكتت لحظة وبعدين ردت علي وقالتلي

“عمرك جه على نفسك تلبسي ستيان؟ عمر الدورة الشهرية وحشتك؟” ضحكت ومردتش بس طبعاً الرد كان واضح. فقالتلي “يبقى عمرك ما هتحبي الكعب، دا يا بنتي وعد ومكتوب مش إختيار، لو كل واحدة وجعها الكعب ملبستوش، هينقرد. تحبي الكعب ينقرض يعني؟”

ابداع مصري جزائري

صباح الفل ومعليش يا شباب خيرها في غيرها،
استمتعنا جميعاً في الاسبوع الماضي بأجمل لحظات السخافة على الشعب المصري والجزائري.
وأكيد كلنا شفنا (على راي تيتة) مولد سيدي كاس العالم عمل إيه. أنا شخصياً كان بالنسبة لي مولد “شفت دة لابس إيه؟” دة حتى المحجبات اللونين أضافوا لون تالت وبقي أحمر وابيض واسود، واللي دهن وشوه، وللي دهن جسمه كله، وإللي لبس، وفي كمان اللي ريح دماغه خالص وقلع ملط. أظن إن دي أول مرة من عهد الفراعنة، الشعب المصري ياخد وقت عشان يكون مبدع بالشكل دة. لطيف أوي إن كل الناس دي لها إنتماء لمصر بس حقيقي عجيب إن الإنتماء دة في الكرة بس.. عامةً أهو إبداع والسلام.. حبيت أفرجكم على إبداع الشعبين في الملابس التشجيعية